Fyrr í vetur tóku nemendur í 9. bekk Grunnskólans á Hólmavík þátt í  undankeppni Stærðfræðikeppni FNV, MTR og 9. bekkjar. Vegna verkfalls framhaldsskólakennara dróst að ljúka við yfirferð á úrlausnum. 

Nú liggja úrslit fyrir í undankeppninni en einungis 15 nemendur komast í úrslit. Tilkynnt var í  dag að Guðjón Alex Flosason nemandi í 9. bekk Grunnskólans á Hólmavík er kominn í úrslit þessarar keppni. Úrslitakeppnin verður haldin eftir páska. Dagsetning verður auglýst þegar nær dregur

Til hamingju Guðjón Alex!

Nemendur 5.6. og 7. bekkjar tóku þátt í söfnuninni Börn hjálpa börnum á vegum ABC barnahjálpar.
Þetta er 17. árið sem þessi söfnun grunnskólabarna fer fram og er hún mjög mikilvæg fjáröflun fyrir ABC barnahjálp. Fyrir afrakstur þessara safnana í gegnum árin hafa þau náð að fjármagna byggingar fjölmargra skóla og heimila fyrir fátæk börn í þróunarlöndunum.

Í ár er safnað fyrir byggingu heimavistar fyrir fátækar stúlkur í Pakistan.
Nemendur grunnskólans  hafa gengið í hús á Hólmavík í vikunni og keyrt um Ísafjarðardjúp með söfnunarbauka.
Vel var tekið á móti þeim og söfnuðu þau hvorki meira né minna 47.539 kr. !

Það var þeirra síðasta verk fyrir páskafrí að leggja þessa upphæð inn á ABC barnahjálp.

Bestu kveðjur og gleðilega páska
Kristjana og Lára

Nemendur í Grunnskólanum á Hólmavík halda leiklistarhátíð í dag í Félagsheimilnu. Hátíðin hefst kl. 17.00
Nemendur bjóða upp á fjölbreytt leik- og söngatriði. M.a. verður sýnt brot úr Skilaboðaskjóðunni.

Nýtt myndband sem nemendur gerðu í samvinnu við nokkra kennara og starfsmenn verður sýnt.

Veitingasala verður í höndum Danmerkurfara.

Allir velkomnir

Undanfarnar vikur hafa nemendur í leiklistarvali Grunnskólans á Hólmavík æft leikritið Skilaboðaskjóðuna eftir Þorvald Þorsteinsson en tónlistin er eftir Jóhann G. Jóhannsson. Verkið verður frumsýnt laugardaginn 5. apríl.

Hefð hefur skapast fyrir samstarfi við Leikfélag Hólmavíkur sem aðstoðar við uppsetningar á stórum verkum sem þessu. Að þessu sinni er það Esther Ösp Valdimarsdóttir sem leikstýrir hópnum, tónlistarstjóri er Hildur Heimisdóttir og leikmynd í höndum Ástu Þórisdóttur. Auk nemenda í leiklistarvali koma flestir nemendur 8. - 10. bekkjar að uppsetningunni auk nemenda í derifnámi FNV á Hólmavík. 

Sýningar verða sem hér segir:
Frumsýning 5. apríl kl.14.00
2. sýning 6. apríl kl.14.00
3. sýning 9. apríl kl.19.00
4. sýning 20. apríl, páskadag kl.19.00
5. sýning 21 apríl, 2. páskadag kl. 14.00

Miðapantanir eru í síma 693-3474

 

Við viljum koma á framfæri þökkum til þeirra fjölmörgu sem hafa aðstoðað hópinn á æfingatímunum. Sérstakar þakkir til foreldrar fyrir þeirra stuðning.

Á morgun miðvikudag er alþjóðadagur einhverfu. Af því tilefni stendur Styrktarfélag barna um einhverfu fyrir því að fólk klæðist bláu þann dag. Markmiðið er að vekja athygli á málefnum einhverfra einstaklinga. Við hér í skólanum ætlum að taka þátt í þessu verkefni og hvetjum alla til að klæðast bláu á morgun.

Árlega er haldin Stóra upplestrarkeppnin fyrir nemendur í 7. bekk á vegum Radda, samtaka um vandaðan upplestur og framsögn. Eins og segir á heimasíðu samtakanna er markmið upplestrarkeppni í 7. bekk grunnskóla er að vekja athygli og áhuga í skólum á vönduðum upplestri og framburði. Keppnin sjálf er í rauninni aukaatriði og forðast skyldi að einblína á sigur. Mestu skiptir að kennarar nýti þetta tækifæri til að leggja markvissa rækt við einn þátt móðurmálsins með nemendum sínum, vandaðan upplestur og framburð, og fái alla nemendur til að lesa upp, sjálfum sér og öðrum til ánægju. Stefnt skyldi að því að allur upplestur í tengslum við keppnina sé fremur í ætt við hátíð en keppni. Þetta á ekki síst við um lokahátíð keppninnar.

Keppnin fór að þessu sinni fram í sal Reykhólaskóla. Þar kepptu nemendur úr 7. bekk Grunnskólans á Hólmavík, Grunnskólans á Drangsnesi, Reykhólaskóla og Finnbogastaðaskóla. Keppendur lásu fyrst upp valinn texta úr sögunni Ertu Guð, afi? eftir Þorgrím Þráinsson, valin ljóð eftir Erlu (Guðfinnu Þorsteinsdóttur) og að lokum ljóð að eigin vali.
Á milli atriða var boðið upp á atriði frá árshátíðarviku Reykhólaskóla og tónlistaratriði frá Grunnskólanum á Hólmavík þar sem Sólrún Ósk Pálsdóttir nemandi í 8. bekk lék lag Emili Sandé, You can read all about it, í eigin útsetningu.
Í hléi var boðið upp á kjötsúpu og heimabakað brauð.

Dómarar keppninnar, sr. Elína Hrund Kristjánsdóttir, Guðjón Dalkvist Gunnarsson ásamt formanni dómnefndar Baldri Sigurðssyni, voru ekki öfundsverð að því að velja vinningshafa en öll sóðu þau sig með stakri prýði. Fyrstu verðlaun hlaut Kári Ingvarsson nemandi í Finnbogastaðarskóla, önnur verðlaun hlaut Aron Viðar Kristjánsson nemandi í Reykhólaskóla og þriðju verðlaun hlaut Daníel Freyr Newton nemandi í Grunnskólanum á Hólmavík. Verðlaunin voru peningakort að verðmæti 10, 15, og 20 þúsund kr. Sérstök verðlaun fékk Brianna Jewel Johnson.
Að auki fengu allir þátttakendur viðurkenningarskjöl og ljóðabók eftir Erlu (Guðfinnu Þorsteinsdóttur).

Við óskum öllum keppendum til hamingju með árangurinn

Bára Örk Melsted nemandi í 8. bekk vann til verðlauna fyrir ljóðið sitt Biðin en alls voru 9 ljóð send inn frá nemendum í Grunnskólanum á Hólmavík  í ljóðasamkeppni í tengslum við Bókahátíð á Flateyri. Alls bárust tæplega 60 ljóð frá grunnskólum á Vestfjörðum og voru þrjú ljóð verðlaunuð. Verðlaunin eru auk viðurkenningskals er fjölskylduferð á Kayak um Önundarfjörðinn í boði Grænhöfða. Nánar um keppnina.

Við óskum Báru Örk til hamingju með ljóðið og verðlaunin
Hér fyrir neðan er ljóðið sem Bára Örk sendi í keppnina:

Biðin
Biðin er löng.
Já. Biðin er löng.
Við erum alltaf að bíða.
Við erum alltaf að bíða eftir einhverju.
Hverju?
Hverju erum við eiginlega að bíða eftir?
Hverju sem er.
Það er erfitt að bíða.
Mörgum finnst erfitt að bíða.
Þeir brjálast.
Biðin eftir öllu.
Biðin eftir heiminum.
Biðin eftir alheiminum.
Eða er það alheimurinn sem bíður eftir okkur?
Alheimur, hér er ég, ég er tilbúin,
þú þarft ekki að bíða eftir mér.
Ég er hér.
 
Bára Örk Melsted

Forsetahjónin heimsóttu nemendur og starfsfólk Grunn- og Tónskólans í dag. Fulltrúar nemenda þau Sigfús, Eyrún, Sunneva og Róbert Fannar, öll nemendur i 10. bekk, tóku á móti forsetahjónunum og fylgdarliði. Þeim var vísað inn í nýja salinn okkar sem var vígður við þetta tilefni. Forsetinn ávarpaði nemendur og sagði þeim m.a. frá uppvexti sínum á Vestfjörðum og tilefni þess að þau hjónin væru á ferð í Strandabyggð. Íris Björg Guðbjartsdóttir kennari afhenti forsetahjónunum gjöf frá skólanum, geisladiskinn Mjúkar hendur sem inniheldur m.a. lög og texta eftir hana sjálfa.
Forsetinn bauð nemendum að koma með spurningar sem ekki stóð á. Forsetinn svaraði greiðlega spurningum eins og "Hvernig kynnust þið Dorrit?" "Eigið þið kindur?" "Númer hvað notar þú af skóm?" "Hvaða tegund er hundurinn þinn?" "Hvar kaupir þú fötin þín Dorrit?" "Áttu önnur föt?" Forsetahjónin svöruðu öllum spurningum greiðlega og upplýsti Ólafur að Dorrit verslaði gjarnan á útsölum og Dorrit upplýsti nemendur um að Ólafur svæfi gjarnan í jakkafötunum. 
Að loknum skemmtilegum fyrirspurnartíma leiddu fulltrúar nemenda forsetahjónin og fylgdarlið í gegnum skólann og upplýstu þau um starfið og svöruðu spurningum.
Í lokinn þótti við hæfi að taka myndir af forsetahjónunum með þessum flottu fulltrúum nemenda. 

Meðfylgjandi myndir tók Jón Jónsson

Í dag keppti Grunnskólinn á Hólmavík í Skólahreysti. Keppnin var haldin á Akureyri. Það voru þau Eyrún Björt Halldórsdóttir og Kristófer Birnir Guðmundsson sem kepptu í hraðabraut, Ingibjörg Jónsdóttir keppti í hreystigreip og armbeygjum og Jamison Ólafur Johnson keppti í upphífingum og dýfum. Til vara voru Sigfús Snær Jónsson, Trausti Rafn Björnsson og Harpa Dögg Halldórsdóttir.

Liðið stóð sig mjög vel og lauk keppni með 41 stigi og hafnaði í 3. sæti í sínum riðli.
Þjálfari liðsins er Ingibjörg Emilsdóttir.

Til hamingju öll með þenna frábæra árangur!